ភ្នំពេញ : ក្នុងជំនួបទ្វេរភាគីរវាងនាយករដ្ឋមន្ត្រីកម្ពុជា និងលោកស្រី Wendy Ruth Sherman អនុរដ្ឋមន្ត្រីការបរទេសអាមេរិក សម្តេចតេជោ ហ៊ុន សែន បានស្នើសុំឱ្យ សហរដ្ឋអាមេរិក ជាពិសេសលោកប្រធានាធិបតី ចូ បៃឌិន ពិនិត្យពិចារណាដោះស្រាយបំណុលដែលកម្ពុជាបានជំពាក់សហរដ្ឋអាមេរិកកាលពីរបប លន់ ណុល ដែលមានទឹកប្រាក់ជិត ៧០០លានដុល្លារ (ទាំងការនិងដើម) តាមវិធីទ្វេរភាគី ទី១ អនុញ្ញាតិឱ្យកម្ពុជាសងបំណុលនេះបន្តិចម្តងៗ ទី២ សងបំណុលតាមកម្មវិធីបង់ការប្រាក់ត្រឹម ១% និងទី៣ បំណុលដែលកម្ពុជាជំពាក់សហរដ្ឋអាមេរិក គឺសំណង ៧០% ត្រូវបង្វិលមកធ្វើជាជំនួយដល់កម្ពុជាវិញទៅលើវិស័យអប់រំ វិស័យវប្បធម៌ វិស័យដោះមីន និងយុទ្ធភ័ណ្ឌមិនទាន់ផ្ទុះជាដើម។

លោកស្រី Wendy Ruth Sherman បានសន្យាថា រាល់សំណើររបស់សម្តេចតេជោបានលើកឡើង នឹងយកទៅជូន លោកប្រធានាធិបតី ចូ បៃឌិន ពិនិត្យសម្រេច។ នេះគឺជាការបញ្ជាក់បន្ថែមពីជំនួយការផ្ទាល់របស់សម្តេចតេជោនាយករដ្ឋមន្ត្រី លោក អ៊ាង សុផល្លែត។

នៅក្នុងជំនួបនោះ លោកស្រី Wendy Ruth Sherman អនុរដ្ឋមន្ត្រីការបរទេសអាមេរិក បាននាំយកលិខិតរបស់ប្រធានាធិបតី ចូ បៃឌិន ដើម្បីជូនសម្តេចតេជោដោយផ្ទាល់ ដោយលោកស្រីបានបញ្ជាក់ថា នេះគឺជាបំណងរបស់ប្រធានាធិបតីសហរដ្ឋអាមេរិក ដើម្បីធ្វើយ៉ាងណាឱ្យប្រទេសទាំងពីរមានមានភាពល្អសម្រាប់ប្រទេសទាំងពីរកម្ពុជា-សហរដ្ឋអាមេរិក។

លោកស្រី Sherman បានសម្តែងនូវការពេញចិត្តយ៉ាងខ្លាំងចំពោះកិច្ចសហប្រតិបត្តិការណ៍រវាងកម្ពុជា-សហរដ្ឋអាមេរិកកន្លងមកលើវិស័យជាច្រើន ជាពិសេស លើវិស័យរុករកអទ្ឋិធាតុទាហ៊ានអាមេរិក ដែលបានបាត់ខ្លួននៅកម្ពុជា។ កិច្ចសហប្រតិបត្តិការណ៍ប្រយុទ្ធប្រឆាំងភេរវកម្មនិងកិច្ចសហប្រតិបត្តិការណ៍លើវិស័យមនុស្សធម៌ដូចជាការអនុញ្ញាតិឱ្យនាវា Amsterdam ចុះចតនៅកម្ពុជាដើម្បីជួយសង្គ្រោះប្រជាជននៅលើកនាវាដែលប្រទេសដទៃទៀតមិនអនុញ្ញាតឱ្យចូលព្រោះដោយសារបញ្ហាជំងឺកូវីដ-១៩។

លោកស្រី  Sherman ក៏បានលើកឡើងអំពីឱកាសនៃកិច្ចសហប្រតិបត្តិការណ៍រវាងប្រទេសទាំងពីររួមមានការលុបបំបាត់បំណុលរបស់កម្ពុជាដែលជំពាក់សហរដ្ឋអាមេរិក សហប្រតិបត្តិការណ៍លើការវិនិយោគទុនប្រេងនិងឧស្ម័ន និងការវិនិយោគលើទឹក ហេដ្ឋារចនាសម្ព័ន្ធថាមពលបៃតង។

ជាការឆ្លើយតបនាយករដ្ឋមន្ត្រីកម្ពុជាសម្តេចតេជោ ហ៊ុន សែន បានសម្តែងនូវការរីករាយនូវអ្វីដែលលោកស្រីអនុរដ្ឋមន្ត្រីបានលើកឡើង ពិសេសសហរដ្ឋអាមេរិកបានចូលរួមចំណែកជួយដល់កម្ពុជា រួមមានការចូលរួមចំណែកស្វែងរកសន្តិភាពនៅកម្ពុជា ការចូលរួមចំណែកអភិវឌ្ឍកម្ពុជា ការចូលរួមជួយរបស់សហរដ្ឋអាមេរិកដោយផ្ទាល់និងដោយប្រយោលតាមរយៈអង្គការ WHO ក្នុងការប្រយុទ្ធប្រឆាំងនឹងការរីករាលដាលនៃជំងឺកូវីដ-១៩។

សម្តេចតេជោក៏បានសម្តែងនូវការអបអរសាទរចំពោះប្រជាជននិងរដ្ឋាភិបាលសហរដ្ឋអាមេរិក ដែលបានទប់ស្កាត់ជំងីកូវីដ-១៩ បានជោគជ័យដែលជាការឆ្លុះបញ្ចាំងនៅប៉ុន្មានថ្ងៃកន្លងមកនេះ មានការចុះថយនៃការរីករាលដាលជំងីកូវីដ-១៩ នៅសហរដ្ឋអាមេរិកគួរជាទីកត់សម្គាល់។

សម្តេចតេជោស្នើឱ្យសហរដ្ឋអាមេរិកពិនិត្យឡើងវិញអំពីកិច្ចសហប្រតិបត្តិការណ៍នៃការបញ្ជូនជនជាតិកម្ពុជាត្រឡប់មកពីសហរដ្ឋអាមេរិកមកកម្ពុជាវិញ៕

^{រូបថតដោយលោក កុក គី}



ភ្នំពេញ : នៅថ្ងៃអង្គារ៍ ថ្ងៃទី០១ ខែមិថុនា លោកស្រី Wendy Sherman អនុរដ្ឋមន្ត្រីក្រសួងការបរទេសសហរដ្ឋអាមេរិក បានជួបពិភាក្សាការងារជាមួយសម្តេចតេជោនាយករដ្ឋមន្រ្តី ហ៊ុន សែន ភ្លាមៗបន្ទាប់ពីបានធ្វើដំណើរមកដល់ប្រទេសកម្ពុជា សម្រាប់ដំណើរទស្សនកិច្ចរយៈពេលមួយថ្ងៃ ដែលជាផ្នែកមួយនៃដំណើរទស្សនកិច្ចការទូតដ៏សំខាន់របស់រដ្ឋសំខាន់ៗអាស៊ាន។

លោកស្រីអនុរដ្ឋមន្ត្រីក្រសួងការបរទេសសហរដ្ឋអាមេរិក ត្រូវបានស្វាគមន៍នៅអាកាសយានដ្ឋានអន្តរជាតិភ្នំពេញកាលពីព្រឹកម៉ិញដោយឯកអគ្គរដ្ឋទូតសហរដ្ឋអាមេរិកលោក W. Patrick Murphy ។

លោកស្រី Wendy Sherman បានជួបជាមួយសម្តេចនាយករដ្ឋមន្រ្តី ហ៊ុន សែន និងគណៈរដ្ឋមន្រ្តីនៅឯវិមានសន្តិភាពដើម្បីពិភាក្សាអំពីបញ្ហាទ្វេភាគីសំខាន់ៗ។

លោកស្រី Sherman បានមកដល់ទីក្រុងភ្នំពេញបន្ទាប់ពីធ្វើដំណើរពីទីក្រុងហ្សាកាតានៅព្រឹកនេះ ហើយនឹងត្រូវបន្តដំណើរទៅកាន់ទីក្រុងបាងកកមុនពេលវិលត្រឡប់ទៅទីក្រុងវ៉ាស៊ីនតោនវិញ។

លោកស្រី Wendy Sherman គឺជាមន្ត្រីជាន់ខ្ពស់បំផុតរបស់សហរដ្ឋអាមេរិកដែលមកធ្វើទស្សនកិច្ចនៅប្រទេសកម្ពុជាក្នុងរយៈពេលជិតមួយទស្សវត្សហើយជាសមាជិកដំបូងនៃរដ្ឋបាល Biden ដែលបានធ្វើទស្សនកិច្ចនៅអាស៊ីអាគ្នេយ៍។ ទីក្រុងវ៉ាស៊ីនតោនកំពុងសម្លឹងមើលការបង្កើនឥទ្ធិពលរបស់ខ្លួននៅក្នុងតំបន់ចំពេលកំពុងមានភាពតានតឹងផ្នែកការទូតជាមួយទីក្រុងប៉េកាំង៕